نداء الوطن

ضاحك ومخنزز
بلا حشمة وبلا حيا
قال واش محتاج مساعدة
وايني مقزدر هذا
لا،لا أمسيو:
أولا ، حيد يديك من الشكارة
ثانيا ، باركة من الشفارة
ثالثا : باركة من الضصارة
الله ينعل اللي ما يحشم
المغرب فران وقاد بحومة
2
المحنة فايتة
باش ما عطى الله دايزة
احنا قدها وقدود
نوصيك ، بعاد عليك حومتي
وحومتي حرام عليك
وحومتي بزاف عليك
حرام تزطم فيها وحرام تاخذ خيرها
اللي فيها يكفيها ، خيرها لماليها
المغرب فران وقاد بحومة
دير الخير فراسك وعيش بحال الرجال
أنت غارق حتى للودنين
والحايحة نايضة عليك في كل وقت وحين
المغرب فران وقاد بحومة
3
عطنا التيقار
وطواه الزمان اللي فات
وقت ليوطي وكرنفال وجوان وديكول فات
المغرب اليوم ماشي هو البارح
والبارح ماشي هو غدا
وغدا عرس كبير
يشطح فيه لكبير والصغير
المغرب ما زال تشوف بعينيك
المغرب فران وقاد بحومة
الحوز بلادنا والاود ولادنا
غير وقع المصاب ندهنا
وصلات غوتتنا لطنجة
ومن طنجة لكويرة
ومن لكويرة لوجدة
ومن مكناس للعيون والسمارة
الناس من طنجة للكويرة وقفات
كل الضرورات والمساعدات وصلات
والمستشفيات تبنات والخيام وقفات
اللي عندنا يسترنا ويغطينا ويكفينا
المغرب فران وقاد بحومة

4
شوفو المراهقة السياسية
باغي يتكلم مع الشعب المغربي
علاه ماعندنا راعي
علاه ما عندنا مؤسسات
باغي تدخل لزريبة الذياب اللي حاضينها الأسود
أسود الأطلس تيلعبوا الكرة ويربحوا
ويلعبوا بالعقول الخفيفة ويمزحوا
وزريبتنا راعها راعي من أسود الأطلس
باني عرينوا على بابها
بالعقل والرزانة يرعاها
ماشي ، غادي المعلم
وما يحط رجليه حتى يعرف فين يزطم
ماية تخميمة وتخميمة وضربة معلم
المغرب فران وقاد بحومة
5
باغي تخطب خاطب غير ناسك
وشوف غير راسك
جاي تلعب نابليون
احنا ماشي ولاد البارح
احنا ولاد اليوم
احنا دولة، احنا أمة، احنا امبراطورية
قبل الثورة الفرنسية
قبل نابليون والجمهورية
سول بواتيي، قرطبة، اشبيلية وغرناطة
الميريا وبلد الوليد وقاديس وتلمسان
سول الكتب وناس زمان
يعاودوا لك كان يا ما كان
حتى كانت شنكيط ونهر السينغال
حتى كانت تومبوكتو وسجلماسة
سول الجبال والديان والآدغال
احنا ماشي تولدنا البارح
الله يعز التاريخ واحنا أقدم البلدان
المغرب فران وقاد بحومة
6
أنت جاي بالنفخة متكي على عكاز
راشي مهزوز يترعد من بوهزهاز
تدق الكمون فالمهراز
الكمون يعطي الريحة
وهي ما صالحة
لا لفراش ولا للتسريحة
فات وقت السطو والغفلة والحكرة
احنا عثرنا ، وطحنا ، ووقفنا على رجلينا
العود باربعة انتاع الرجلين وكيعثر
ويوقف ويعطيها للحركة والتبوريدة
وتسمع الصلاة على النبي والتزغريدة
داز وقتكم واحنا قدامكم
الند للند واليد فاليد
المغرب واقف على رجليه
المغرب فران وقاد بحومة